देशभरका प्रमुख राजमार्ग र सडकखण्डहरूमा अविरल वर्षापछिको बाढी तथा पहिरोले यातायात प्रभावित भएको छ। केही सडक पूर्णतः अवरुद्ध छन् भने जोखिमको आकलन गरी कतिपय स्थानमा एकतर्फी वा निश्चित समय तोकेर मात्र सवारी आवागमन भइरहेको छ।
नेपाल प्रहरीले सोमबार बिहान ६ बजेसम्मको अद्यावधिक जानकारी सार्वजनिक गर्दै बाढी र पहिरोले अवरुद्ध तथा प्रभावित सडकहरूको अवस्थाबारे सूचित गरेको छ। कोशी प्रदेशको सङ्खुवासभामा कोशी राजमार्ग अझै पनि पहिरोले अवरुद्ध छ। खासगरी, मकालु गाउँपालिका–४ स्थित नेता भिरमा असोज २ गते बिहान खसेको पहिरोले उक्त सडकखण्ड त्यसयता खुल्न सकेको छैन।
बागमती प्रदेशका जिल्लाहरूमा पनि बाढी र पहिरोको सम्भावित जोखिमलाई मध्यनजर गर्दै यातायात व्यवस्थापनमा विशेष सतर्कता अपनाइएको छ। काभ्रेको बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा बाढीको जोखिमलाई ध्यानमा राखेर सवारी सञ्चालनमा नियन्त्रण गरिएको छ। साँझ ७ बजेदेखि बिहान ५ बजेसम्म यो खण्ड बन्द रहनेछ। बिहान ४ बजेदेखि साँझ ६ बजेसम्म भने सडकको अवस्था हेरी १० टनसम्मका मालवाहक सवारीहरूलाई मात्र चल्न दिने निर्णय भएको छ।
रसुवामा बाढीका कारण जिल्लाका मुख्य सडकखण्डहरू अवरुद्ध छन्। नुवाकोटको शिवपुरी गाउँपालिका–८ स्थित घट्टेखोलामा बाढी तथा पहिरोको जोखिम बढेपछि टोखा–छहरे सडकखण्डमा रातिको समयमा सवारी आवागमनमा रोक लगाइएको छ।
यस्तै, विदुर नगरपालिका–१० को सिमटारमा पासाङल्हामु सडकखण्ड बाढीले पूर्ण रूपमा अवरुद्ध भएको प्रहरीले जनाएको छ। धादिङ हुँदै जाने पृथ्वी राजमार्गमा भने पहिरो हटाई एकतर्फी यातायात सञ्चालनमा ल्याइएको छ। बेनीघाट रोराङ गाउँपालिका–१० मा पर्ने ज्वाडखोला र शीतलबजार क्षेत्रमा खसेको पहिरो पन्छाएपछि सडक खुलेको हो।
प्रहरीका अनुसार, सडक विभाग र सुरक्षा निकायका टोलीहरू अवरुद्ध सडकखण्ड खुलाउनुका साथै जोखिमयुक्त स्थानमा यातायात व्यवस्थापनमा खटिएका छन्। लगातारको वर्षाका कारण सडकको अवस्था जुनसुकै बेला पनि परिवर्तन हुनसक्ने भएकाले यात्रुहरूलाई आवश्यक सावधानी अपनाउन आग्रह गरिएको छ।
