पृथ्वी राजमार्गअन्तर्गत कृष्णभीरमा पहिरोले भासिएको सडकमाथिबाट निर्माण सामग्री र उपकरण लैजान खोलिएको वैकल्पिक 'ट्र्याक' फराकिलो बनाउन थालिएको छ। अवरुद्ध सडक सञ्चालनमा ल्याउने तयारीस्वरूप माथिल्लो भागमा रुख कटान र झाडी फाँडेर यो ट्र्याक खोलिएको थियो।
नौबिसे–मुग्लिन सडक आयोजनाको पश्चिमखण्डका इञ्जिनियर सचेन्द्र मिश्रका अनुसार, पहिरो गएको स्थानमाथि निरन्तर काम गरेपछि डाँडामाथिबाट दुवैतर्फ करिब चार मिटर चौडाइको ट्र्याक खुलेको हो। हिजो खुलेको ट्र्याकलाई फराकिलो बनाउने काम सुरु भइसकेको उनले जानकारी दिए।
यद्यपि, सर्वसाधारणका गाडी गुड्न अझै समय लाग्ने मिश्रको भनाइ छ। माथितिर भित्ता काट्ने, बाटो चौडा गर्ने, ग्राभेलिङ गर्ने, ग्रेडिङ मिलाउने, र डिजाइनअनुसार पहिरो व्यवस्थापन गर्ने लगायतका धेरै काम बाँकी छन्।
भदौ मसान्तसम्ममा सर्वसाधारणका सवारीसाधन सञ्चालन गर्न मिल्ने गरी तीव्र गतिमा काम भइरहेको आयोजनाले जनाएको छ। मिश्रका अनुसार, अहिले डिजाइनअनुसार काम गर्ने वातावरण बनेको छ, र निर्माणका लागि आवश्यक प्राविधिक सामग्री तथा जनशक्तिको अभाव छैन। यसले सडक निर्माण कार्यलाई सहज बनाएको छ।
नयाँ सडक खोल्ने काम शर्मा–जेडआइभी जेभी निर्माण कम्पनीले गरेको हो। कम्पनीका साइट प्रबन्धक इञ्जिनियर ईश्वर नेपालका अनुसार, मुख्य सडकबाट करिब २० मिटर अग्लो र ३५० मिटर लामो ट्र्याक खोलिएको छ।
यो ट्र्याक निर्माण सामग्री लैजान, इन्धन पुर्याउन र कामदार आवतजावत गर्न सहज भएको नेपालले बताए। हाल यो ट्र्याक निर्माण प्रयोजनका लागि मात्र प्रयोग भइरहेको छ, सर्वसाधारणका लागि नयाँ सडक खुलेको होइन।
स्लोप कटिङ, भित्ता काट्ने, ढुङ्गा थुपार्ने, ग्रेडिङ मिलाउने लगायतका धेरै काम अझै बाँकी रहेको उनको भनाइ छ। आपत्कालीन अवस्थामा भने सर्वसाधारण पनि हिँडेर वारपार गर्न सक्ने अवस्था बनेको छ। अब दुवैतर्फबाट डिजाइनअनुसार सडक निर्माणको काम अघि बढाइनेछ।
आजदेखि निर्माणस्थलमा भारी उपकरणहरू थप गरिएको छ। दुई एक्साभेटर थप गरी कुल सात एक्साभेटर परिचालन गरिएको छ। यसका साथै एउटा जेसिबी, लोडर र दुई बुल्डोजर पनि प्रयोगमा ल्याइएको छ। आवश्यकताअनुसार उपकरण थप्दै लगिने निर्माण कम्पनीले जानकारी दिएको छ।
