नबिल म्युचुअल फण्डअन्तर्गत सञ्चालित दुई योजनाले आर्थिक वर्ष २०८२/८३ को प्रतिफल घोषणा गरेका छन्। नबिल बैंक लिमिटेडको कोष प्रवद्र्धन तथा नबिल इन्भेष्टमेन्ट बैंकिङ लिमिटेडको योजना व्यवस्थापनमा रहेका यी फण्डहरूले इकाईधनीलाई नगद प्रतिफल दिने निर्णय गरेका हुन्।
योजना व्यवस्थापकको सञ्चालक समितिको १३१औं बैठकले नबिल ब्यालेन्स फण्ड–२ का इकाईधनीलाई ३.५ प्रतिशत नगद प्रतिफल वितरण गर्ने निर्णय गरेको छ। यस योजनाले प्रतिफलबापत कुल ३ करोड ९२ लाख रुपैयाँ बाँड्नेछ।
त्यसैगरी, नबिल ब्यालेन्स फण्ड–३ ले आफ्ना इकाईधनीलाई २.५ प्रतिशत नगद प्रतिफल दिने भएको छ। यो योजनाले कुल ३ करोड १२ लाख ५० हजार रुपैयाँ नगद प्रतिफल वितरण गर्नेछ।
यता, नबिल फ्लेक्सी क्याप फण्ड र एनआई ३१ ले भने आर्थिक वर्ष २०८२/८३ का लागि कुनै लाभांश वितरण नगर्ने भएका छन्।
घोषित प्रतिफल वितरणका लागि नबिल म्युचुअल फण्डअन्तर्गतका सम्बन्धित योजनाहरूको इकाईधनी दर्ता किताब २०८३ साल असोज ७ गते बुधबार एक दिनका लागि बन्द हुनेछ। बुक क्लोज हुनुअघिल्लो दिनसम्म नेप्सेको प्रणालीमा कारोबार भई प्रचलित कानुनबमोजिम तोकिएको समयभित्र रीतपूर्वक नामसारी भएका इकाईधनीहरू मात्र घोषित प्रतिफल प्राप्त गर्न योग्य हुनेछन् भन्ने जानकारी सम्बन्धित निकायले दिएको छ।
