एसईई २०८४ को परीक्षाका लागि आवेदन प्रक्रिया सुरु भएको छ। राष्ट्रिय परीक्षा बोर्ड र परीक्षा नियन्त्रण कार्यालयले कक्षा १० का विद्यार्थीहरूलाई अब आवेदन फारम भर्न खुला गरेको हो।
नियमित, खुला तथा प्राविधिक धाराका विद्यार्थीले कात्तिक १ गतेदेखि मंसिर ८ गतेसम्म आवेदन दिन सक्नेछन्। प्रत्येक विद्यार्थीले ५०० रुपैयाँ परीक्षा दस्तुर तिर्नुपर्ने छ।
त्यस्तै, कक्षा ९ का विद्यार्थीहरूका लागि रजिस्ट्रेशन फारम पनि उपलब्ध भएको छ। शैक्षिक सत्र २०८३ मा कक्षा ९ मा दर्ता भएका विद्यार्थीले कात्तिक ९ गतेदेखि मंसिर १३ गतेभित्र रजिस्ट्रेशन पूरा गर्नुपर्नेछ।
रजिस्ट्रेशनका लागि ३०० रुपैयाँ राजस्व शुल्क तोकिएको छ। यो रकम तिरेर मात्र विद्यार्थीको नाम आधिकारिक दर्ता प्रक्रियामा समावेश हुनेछ।
बोर्डले सम्बन्धित विद्यालयहरूलाई विद्यार्थीको आवेदन र रजिस्ट्रेशन समयमै सम्पन्न गराउन आग्रह गरेको छ। विद्यालयहरूले निर्धारित मितिभित्र प्रक्रिया टुंग्याउनुपर्ने बोर्डको तर्फबाट स्पष्ट पारिएको छ।
